Sarajevo... kie gxi trovigxas? Cxu damagxoj kaj dangxeroj de la milito pludauxras? Cxu la urbo estas alloga turismejo? Kiun lingvon oni parolas tie? Cxiukaze lingvon certe nekonatan de mi... Jes, pasinttempe multaj antauxjugxoj vagis tra mia kapo.
Sed inter duboj, aliaj pensetoj aperis: Mi jes ja volas denove malkovri alian landon, observi kiel vojagxanto vivojn de aliuloj, renkonti homojn el alia kulturo. Kaj mi certe ne volas resti stulta ano de okcidenteuxropo dum mia tuta vivo, nenion scianta pri ajna lando pli orienta ol Germanio. Cxu vi povas imagi, ke jxuste tia ulo mi nun estas? Terure!
Kaj jen antaux kelkaj tagoj alvenis unu el tiuj momentoj, en kiuj subite el nenio unu nesxangxebla decido falas en mian kapon. Gxi diris al mi: "Sal', mi estas via decido. Vi vojagxos al Sarajevo, partoprenos IJKon kaj poste turismumos en la proksimeco. - Cetere, bonan tagon, mi gxojas renkonti vin."
Post legi kelkajn vikipediajn artikolojn, mi vere devas konstati ke BiH estas ege alloga ejo. Tri popoloj kaj iliaj lingvoj, tri religioj, "orienteskaj" turismejoj, afablaj homoj... kaj krome, gxi igos min "vera" euxropano. Kion plu mi deziru?! Ek...